Ds Jugijahr 2011/2012 hei mir am 19. Ougste 2011 mit 43 Giele i zwöö Gruppe gstartet. Vor de Herbstferie hei mi zum erste Mal e chline Liechtathletikwettkampf dürä gfüährt. Am zweite Dezember 2011 si mir mit öpä 25 Buebe uf dr Ischbahn gsi. Dert hei mir äs abwechsligsrichs Trening düri gfüährt. D Waldwienachte wo vor de Wienachtsferie es Highlight heti sölä si hei mir wägem schlechte Wätter (Rägä u starche Wind) leider müäsä Absägä.
Am 27. Januar 2012 si mir zum zwöite Mal mit dr Jugi gha schwinge, dert hei mir unter fachkundiger Leitig äs Schwingtraning dörfä dürä füährä. Am Samschti 18. Februar 2012 si mir mit emene grosse Teil vo üsnä Giele a Betelberg gha schlittle.
Ändi März het es Grüpeli vo üsnä Buebe zum zweite Mal am Unihocketurnier ds Langnou mitgmacht, mir si dert uf sehr guet viert Rang cho. Mir hei ä unbeschribliche Tag ds Langnou erlebt.
Da igentli uf afangs April 2012 üsi Dorfturnhalle heti sölä abbroche werde hei mir Leiter e Alternative gsuecht. Mir hei d Idee gha mit üsnä Giele na dr Ostere d Kuspohalle unsicher ds mache. Dr Martin het na es paarne Telefon u verhandlige herebrunge das mir abem 13 April 2012 im Kuspo dörfä turne. Das ganze het zum Glück ou nid gänderet wo das ganze Halleprojekt no isch hinderigschobe worde.
Am 25. Mai 2012 hei mir mit dä Giele ä Biketour underno, mit dr chlinere Gruppe si mir vom Dorfschuelhus i d Simmefäll gfahre, hei dert e chline Hindernisparcours ufgstellt u aschliessend wieder i ds Dorf gfahre. Mit de grosse simer chli i d Bärgä. Mir si d Ägerte uf gfahre u ner richtig Walleg überi, dert si mer wieder uechi so das mer ir Hohliebi si achi cho, när simer zum Seeli hinderi u richtig Kuspo. U dert hinder bim Kuspo no chli hinderi so das mer bir Schanze obeachi si cho ds fahre.
Ä sehr schöni aber ou astrengendi Biketour hei mir erlebt, es het allne riesige Spass gmacht.
Näbä dene Spezialaläss si mir süsch jede Fritiabe zeme cho u hei e lustigi aber mengisch ou astrengendi Lektion dörfä erlebe.
Am 15. Juni 2012 hei mir dr inzig Unfall gha i dem Jugijahr, mir hei gschuttet u dr Goalie het e Ball so abblocket dass es ihm gad ds Handglenk broche het. Jedoch heter dank em Gips ou di rästliche Tranings bis endi Jahr chene bsueche.
Süsch si mir zum Glück unfallfrei dür ds Jahr cho.
Ds Highlight u dr Abschluss vo üsem Jugijahr hei mir mit üsem Jugilager dörfä erlebe. Mir hei üs am 23. Juni am morge bim Bahnhof troffe. Si när mitem Bus ufe Büählberg gfahre u vo dert us richtig Hahnemoos gloffe. Di chline si uf halber höchi richtig Vierschildhütä gloffe u di grössere si no witer uechi bis ufe Lavey gloffe u vo dert traversiert so dass mer na öpä 1.5 Stund d Vierschildhüttä erreicht hei. Dert hei mir zersch mal d Unterkunft igrichtet. Mir hei ds Höii u ds Strou so büschelet das es für d Bueb isch sicher gsi u das si ä schöni Unterkunft hei gha. Für d Allergiker u für d Leiter hei mer näb dr Hüttä 3 Zält ufgstellt. Wo üsi Füürstelle si igrichtet gsi hei mir Gruppe bildet u de Buebe dr Uftrag gäh im Wald es paar Hüttli oder Unterständ ds boue. Mir hei di Wärk na 2.5 Stund bewertet u si überrascht gsi was für tolli Werk entstande si. Na dem heimer no chli Frissbee gspilt u hei när gägä abe afah brätlä. Am Lagerfüür hei mir üs Witze u gruselgschichte verzellt öpä um Mittinacht si när alli giele am liege gsi u ou mir Leiter hei i ds Zelt chene schlüpfä. Na öpä 5 Stund schlaf si di erschte scho wieder uf gstande u hei e wunderbare Sunneufgang chene erlebe. Wo ali Buebe si uf gsi hei mir ds Zmorge gässä u hei namene zitli wieder afah ufrume. Wo das isch gmacht gsi, si mer no i ds Restaurant Loubbärgli uechi gloffe u hei dert ds Zmittag / Zvieri gässä. Es het e feini chalti Platte gäh. När simer wieder achi gloffe hei dert üses Gepäck mitgno u si so wieder zrugg zum Bahnhof gloffe. Dert si d Buebe öpä am Namitag am 4i vo de Eltere abgholt worde. Da dermit isch äs sehr spannends u abwechsligsriichs Jugijahr ds end gange. Mir si stolz das mir ou ändi Jahr gäng no 43 Buebe i üsärä Jugi hei dörfä ha.
