Jahresbericht 2016 / 2017

I dem Bricht geits um d Jugi Knaben, weg dr eifachheit u gwohnheit hie nume ging als „d Jugi“ gnennt.

Mir si am 19. Ougste 2016 i ds nüiie Jugijahr gstartet. Mir hei 5 nüii Mitglieder dörfä begrüäsä u hei mit insgesamt 39 Buebe gstartet.

Am 02. September hei mir mit alne Giele ä Liechtathletikwettkampf dürä gfüährt. Dr Stefan het d Resultat ahand vo de Wärtigstabellene vom STV usgwärtet u ä Ranglischte erstellt. U so hets ergäh, dass viel jüngerie Buebe besser klassiert si gsi als di ältere oder sogar besser als d Leiter. ;-)

Am Suntig 25.Septemberisch dr Iffigelouf resp. dr KUSPO-Run gsi. Dr Livio u mini Wenigkeit hei am morge dr Bärglouf i Agriff gno. Bevor mir am Namitag mit 9 Buebe am KUSPO-Run mitgmacht hei. Vo dene 9 Buebe si 5 uf ds Podestgloffe. Dervo hets 1 1. Rang, 2 2. Rang u 2 3. Rang für d Jugi gäh.

Am 16. Dezember 2016 het üsi traditionelli Waldwienachte stattgfunde. Mir hei üs am 5i bim Schuelhus troffe u si när via Lenkerseeli, Ey i Metschgrabe . Dert hets für jede Bueb Cervelats, Brot, Ärdnüssli u Mandarindli gäh. Mir hei ds Jahr 2016 gmüätlich am Füür lah usklinge.

Am 20. Januar 2017 het üses traditionelle Schwinge im Schwingkeller ds St.Stephan stattgfunde. Unter Fachkundiger Aleitig vom Jungschwingertrainer Chrigel Schenk hät är üs ä Ifüährig i Schwingsport gäh. Dä Giele hets gfalle sich im Sagmähl chönä usdstobe. D Eltere hei albe weniger fröid dranne, we alles voll Sagmähl isch… J

Am Samschtimorge vom 04. Februar 2017 si mir a Betelberg ga schlittle. Mir hei i 3 Stund bis zu 6 Fahrte ufe Stoos gmacht. Derbi het ds „schmierä“ und ds „rumä“ nid dörfä fählä. I bi gloub no nie so mängisch abem Schlitte gfloge wi a däm Tag. Plötzlich isch wieder ä Giel hindefürä cho u het mi Schlitte dräit, dasi im Schnee glandet bi. Bir letschtä Abfahrt hets plötzlich agfange lufte und schneie wi verruckt, so dass me öpä nume no 5-10 Meter gesh het. U so simer när chli lengsemer u vorallem ali mitenand ufe Stoss achi gfahre. Äs het wahnsinnig gfägt u isch ä sehr luschtige Morge gsi.

Am 10. März hei sech di ältere Buebe bim Wärkhof troffe, mir hei ä OL dür d Lenker Winterlandschaft absolviert. Di jüngere hei den ke Jugi gha, wüll ds Schüelerrenne a dem Tag stattgfunde het. Mir si mit de ältere zum Lenkerseeli gloffe u hei dert 2er Gruppe gmacht. Mitere Taschelampe usgstattet hei mir OL-Karte verteilt. Dert si 8 Pöste izeichnet gsi wo d Giele verschiedene Ufgabe hei müäsä absolviere, so zum Bispil irgendöpis zeichne. Dass d Giele nid hei chönä abschriebe het jede Poste ä andere Farbstift gha, so dass es üs Leiter sofort wär ufgfalle we öper nid bimenen Poste wär gsi. Na 40 Minute si di erschte Giele zrugg gsi. Dass si sech vo de Strapaze hei chönä erhole, hei mir Leiter bir Brätlistell mit warmem Tee und Schoggicake uf sä gwartet. Am 8i hei mir üs wieder ufe Wäg gmacht richtig Werkhof, dert isch die Lektion beendet worde.

Ä Wuche später, am 17. März 2017 wär üses Spiel und Spass im Schnee planet gsi. Dr Säm u ig hei di ganzi Wuche vorhär bibberet ob mir irgendwo no chli Schnee finde. D Täg vorem Friti si mit bis zu 20 Grad sehr warm gsi u am Schnee het me chönä zuegugge winer schmilzt. Mir hei aber glich no äs Plätzli ir Ey gfunde mit chli Schnee. U so heimer üs am 5i bim Schützehuus mit Rutscherli troffe. Äs si keni 5 Minute vergange u ali si Nass gsi, äntwäder vom füächtä Schnee oder vom desume Sekle i dä Skikleider bi öpä 15 Grad. U natürlich si o mier Leiter wieder vo de Giele mit Schnee gwäschä worde. Mir hei verschiedni Gruppe gmacht u jede het das chönä mache was er gad het welle. So hei mir zum Bispil Rugby oder Fuessball gspielt oder si am Hang ga achirutsche. Di ältere Giele hei ä grossi Schanze boue, so dass si mit dä Rutscherli feiechli dür d Luft gfloge si. U dankem Schnee si si o meh oder weniger weich umi glandet. Äs isch umi inisch ä Abe gsi wo o üs Leiter wahnisinng Spass gmacht het.

Am 26. März 2017 het näbem Jugilager warschindli ds gröschtä Higlight stattgfunde. Am Morge am halbi 7ni, ir Nacht na dr Zitumstellig, hei mir üs am Bahnhof Lenk troffe. Mir si mit 2 Mannschafte also 20 Giele wieder uf Langnau gange u hei dert am Unihockeyturnier mitgmacht. Eis Spiel het immer 15 Minute duret. Na 11 Trainings am Zischitg abe hets jetzt ärnscht gulte. Unterem Lead vom Livio het di älteri Gruppe ir Kategorie Large am Turnier mitgmacht. Si hei ir Gruppephase 3 vo 4 Spiel zum Teil sehr knapp aber zum Teil o sehr dütlich verlore. Am Namitag hets für di älteri Gruppe drum nume no eis Spiel gäh. Es isch ds Rangierigsspiel um Platz 9 gsi. Nar Reguläräspielzyt ischs 1:1 gstande u drum ischs no i ds Penaltyschiesse gange. Dert het Gondiswil chli di bessere Närvä gha u das Spiel für sich entschieden. Drum isch di älteri Gruppe ufem 10. u letschte Rang klassiert worde. Si hei ä relativ jungi Mannschaft gha, aber hei trotzdem ä super Leischtig zeigt.
Är jüngere Gruppe ischs besser gange. Si si Furios gstartet u hei ds erschte Spiel mit 8:6, ds zweite mit 8:1, ds dritte mit 7:2 gwunne. Ds letschte Spiel ir Gruppephase hei si mit 4:3 sehr knapp verlore. D Gruppephase hei si mitemene Torverhältnis vo 26 gschossene zu 12 kassierte Goal beendet. Si si sowit gsi, dass we si im nächste Spiel gwinne im Final vor Gruppe Medium stöh. U so si si voll motiviert a ds Spiel gange. Aber schnell hei si müäsä merke, dass es hür nüt mitem Final wird. Mir si schnäll 4:0 im Rückstand gsi. Bis zu dem Zytpunkt si hani di beschte Spieler woni ha gha la spiele. I ha gmerkt, mir hei kei Chance u drum hani dr Plan gänderet, di schwechere Spieler hei viel meh Isatzzyt übercho. Di bessere hei säch drum chli dörfä erhole, so dass si de im Spiel um Platz 3 vollgas chöi gäh. Dä Entscheid isch nid bi alne Buebe guet acho, u so hei zwe no währendem Spiel Tränä verdrückt, dass es nüt mitem Final wird. Mir hei das Spiel mit schlussendlich 1:15 verlore. Aber mir si ja no im chline Final gsi u dä dritt Platz hei mir üs jetz welä sichere. Mir si guet gstartet, hei aber schnäll ä dumme Gägäträffer kassiert so dass mir 0:1 i Rückstand si grate. Di erfahrerne Spieler si jetzt im Duurisatz gsi und hei das Spiel souverän dräit. Wo mir mit 6:1 si vore gsi, hani dä schwächere Spieler o wieder Isatzzyt gäh. U so het jede Spieler ou im letschte Spiel mindestens 1 Mintue chönä spiele. Und di jüngeri Gruppe het dr chli Final schlussändlich mit 8:1 gwunne und isch dermit ufe 3. Platz cho. D Fröid bi alne im Team isch sehr gross gsi. Mit däm heti niemer grächnet.
Nar Rangverkündigung simer als Dank fürä Isatz während de Trainigs und o während em Turnier ds Langnau i Mc Donalds u hei üs dert gstercht füre Heimwäg a d Lenk. Am Abe am 7ni simer müäd aber glücklich ar Lenk acho.

Am Wucheend vom 10. / 11. Juni 2017 het üses Jugilager stattgfunde. Dr Wätterbricht isch genial gsi, am Samschti no chli Wulche ca. 25 Grad. U am Sunti strahlend Blau mit Temperature um 30 Grad. U so hei mir üs am Samstimorge am 08.15 bim Bahnhof Lenk troffe.Hür heimer 14 Giele dörfä begrüäsä. Am 08.30 simer i ds Bösli vom Roland Oehrli igstige u si i d Lounene gfahre. Vo dert simer hindere a Louenesee gloffe. U när heimer dr Steil ufstieg via Chüetungel und Stieretungel i Agriff gno. Unterwegs heimer Zmittag usem Rucksack gässä. U när simer öpä no ei Stung unterwegs gsi bevor mir a üsem Lagerplatz im Stieglberg itroffe si.
Als erschts hei mir üsi Zelt ufboue und igrichtet so dass mir parat si gsi für d Nacht.
Aschliessend hei d Giele d Müglichkeit übercho ä Drache ds bastle. D Leiter hei im Vorfeld ä passendi Aleitig, Hölzli, Dracheschnuer und ä alte Fallschirm organisiert.
Mir si gloub no keini 5 Minute am bastle gsi, wo sech dr erscht Giel het i d Finger gschnitte. Und äs isch o nid dr einzig blib, insgesamt heimer üses Pflästerlisortiment zimli strapaziert. Wo d Lagerfüür si nachi gsi, heimer agfange Tee choche und mir si parat gsi für üses Zvieri. Für die Buebe wo hei wöllä, hets ä Schoggibanane gä. När isch ds baschtle witer gange u nach churzer Zit si scho di erschte Drächä dür d Lenker Alpeluft gfloge. Ds Baschtle vom Drache isch nid ganz eifach gsi u drum hets o chli Geduld brucht, bis jede Bueb si Drach zmingscht ä chli het chönä la flüge.
Wo si ihre Dräche hei gmacht gha, hei si chönä mache was si hei wele. U so hets di meischte Giele zum nachglägnä Bächli zoge. Dert hei si nid lang zögeret u si i ds Ischchalte Schmelzwasser ga bade. Oder si hei ganz eifach ds Wasser gstouet. D Zyt isch wi im Flug vergange. U scho bald isch Zyt gsi für ds Znacht. D Giele hei ds mitbrachte Fleisch ufem Grill brätlet. U so heimer üs gstercht fürä witer Abig. Nam Znacht hei d Giele äs nid offiziells Lagerfürli, chli absits vo dä Leiter gmacht. Öpä am 10ni hets no ds Dessert gäh, üsi traditionelli Schoggicreme. Dr Abe isch a dene Lagerfüürli langsam usklunge. Öpä um Mittinacht si d Leiter ga liege. Di Giele si scho vor üs i d Zält verschwunde, jedoch isch a Rueh no lang nid ds dänkä gsi. Wo si gmerkt hei gha, das mir Leiter im Zelt si, isch d Party vo de Giele so richtig losgange. Am Knistere ah, hei si wieder äs riesigs Füür gmacht gha und jetzt ischs ersch rächt richtig Lut worde. Mi het sä bis öpä am morge am 4i ghört däsume rüäfä u sekle. Am halbi 5i am morge bi ig ufgstande u ha am Lagerfüür immerno 4 Giele atroffe. I ha se gfragt ob si mit uf ds Rothorn chömä, dr Sunneufgang cho agugge. Zwe vo ihne hei spontan zuegseit. Und so si mir ds viert, di zwe Giele, dr Säm u ig am morge früäch los gloffe uf ds Rothorn. Na öpä 25 Minute Ufstieg, zum teil uf alne vierne wülls so stotzig isch gsi simer ufem Gipfel acho. Dr Lohn für di asträngig isch ä fantastische Sunneufgang gsi. Churz vor dä 6i am morge isch d Sunne da gsi u mir hei üs ufe Abstieg gmacht. Womer unde ufem Lagerplatz si acho, si di meischte giele wieder oder ging no wach gsi. Wo de alli Leiter und Giele uf si gsi, hei mir ds Zmorge gässä. Na däm heimer dr Lagerplatz afah ufrume, hei ds Gruppeföteli gmacht und si när vom Lagerplatz furtgloffe. Üsä Rückwäg het üs via Stüblenipass, Leiterli und Luchstrail zum Restaurant Wallegg gfüährt. Dert heimer als Zvieri ä chalti Platte und erfrischendi Getränk organisiert gha. Am 4i am Namitag isch ds Lager offziell ds Änd gange. Mi het ghörä sägä, dass es Giele het gä wo so müäd si gsi, dass si no im Outo zum heifahre si igschlafe…

Das si üsi Alternativprogramm und Jahreshiglight gsi. Im Normallfall hei mir üs ir Mehrzweckhalle troffe u hei dert i 2 Gruppe turnet oder üs bewegt. Insgesamt hei mir üs 33 Mal troffe. Mit 36 Jugigiele hei mir üses Jugijahr beändet. Mir hei im letschtä Jahr 939 Händ zur Begrüäsig dörfä schüttlä und im Durchschnitt 28.45 Giele pro Abig dörfä begrüäsä. Das heisst im Durchschnitt si jede Fritig 79.04% vo de Giele awäsend gsi. Alles in allem ischs umi eis unvergesslichs Jugijahr mit eire wilde Bandi gsi.

 

Hie no es paar Zahle us dr Statistik vor Jugi:

33

Mal hei mir turnet

32

Mal isch ds maximum gsi wo e giel ir Jugi isch gsi bi de jüngere und

33

Mal bi de ältere

36 Giele hei mir ängi Jahr ir Jugi gha. Ufteilt si das gsi

23

älteri

13

jüngeri

Vo 1189

Summierti müglichi Azahl Lektione si

939

Stück bsuecht worde.

Im Durchschnit hei mir

11.94

Jüngeri und

16.52

Älteri Giele pro Abe dörfä begrüäsä.

Das git im Schnitt

28.45

Giele pro Fritiabe

I Prozent usdrückt si jede Fritiabe

91.8%

Vo de jüngere und

71.8%

Vo de ältere awäsend gsi

Über di gsamti Jugi gseh, si jede Friti abe

79.04 %

Awäsend gsi.

Juli 2017 / Dominik Buchs