Jahresbericht vom Jugijahr 2015/2016

I dem Bricht geits um d Jugi Knaben, weg dr eifachheit u gwohnheit hie nume ging als „d Jugi“ gnennt.

D Jugi isch am 14. Ougste 2015 im KUSPO i ds nüiie Jugijahr mit 3 nüie Mitglieder u insgesamt 38 Jugigiele gstartet.

Da mir üs entschlosse hei, ds erschte Mal am Jugitag mitdsmache. Hei mir 2 Wuche später ds erschte Mal mit de Meitli zämä für d Pendelstaffette vom Jugitag trainiert.

Am 06. September 2015 hei mir üs am morge ufem Gadeparkplatz troffe u si när uf Zweisimme a Jugitag. Di 15 Giele, wo si mitcho hei i de Diszipline Witwurf, Witsprung und Hinernisparcours mitgmacht. Zämä mit de 14 Meitli si si ufem sehr guete dritte Rang klassiert worde.

Wome de ändli ds Üäbä füre Jugitag heti chönä la si, isch scho dr nächst Uftritt vor dr Türe gstande. Ds Üäbä für üsä Uftritt ar Eröffnig vor Mehrzweckhalle het di witere Trainings prägt. Mir hei ä chlini Minitrampolinshow igstudiert.

Am Samstiabig 26. September isch üsi nüiie Mehrzweckhalle endlich eröffnet worde. Mir hei zämä mit alne Riege vom DTV ä guete Uftritt gha

Nume chli meh als 12 Stund später ischs für es 8 Jugigiele und 2 Leiter scho wieder zur Sach gange. Sie hei am Iffigelouf resp. KUSPO-Run mitgmacht. Vo dä Giele isch eine ufe zweit Platz gloffe.

Na de Herbstferie si mir zum erste Mal ir nüiie Mehrzweckhalle am turne gsi. Es isch ganz es komisches Gfüähl plötzlich wieder ire chlinere Halle ds si. Mir freue üs aber mega ab dem Bou , dä nüiie Müglichkeite und endlich wieder dert ds turne, wo mir eigentli iquartiert si. Und vorallem ds wüsä, das am Fritiabig d Halle für üs reserviert isch u nume sälte öpis derzwische chunt…

Am 06. November si mir wieder im Schwingkeller ds St. Stephan adstreffe gsi.

Am 04. Dezember heimer d Ischbahn bsuecht u hei üs dert ustobet.

Ä Wuche später het üsi traditionelli Waldwienachte stattgfunde. Mir hei üs bim Schuelhus troffe si via dr Schanzestrass i ds KUSPO gloffe u när zum Lenkerseeli. Dert hets für ali wieder Cervelats, Erdnüssli, Tee, Häxäpunsch, Mandarindli u Schöggeli gäh. So hei mir ds 2015 lah usklinge.

Am 22. Januar 2016 heimer üs verusse im Schnee ustobet. Üses Spiel und Spass im Schnee het stattgfunde. Mir si hindere a Schanzeriih u si dert achigrutscht, hei Fangnis, Rugby oder Fuessball gspielt oder hei änand chli gschmieret. D Giele hei üs Leiter o dörfä schmierä, we si si iverstande gsi dass mir si ou schmierä. Und so si d Leiter wie ou d Giele womer zrug bim Schuelhus si gsi, meh als Schneemänner desumegloffe. 28 Giele gägä 2 Leiter, obs Fair isch cha jede selber denke…;)
Äs isch dr Wahnsinn gsi u het gfägt wi verrukt.

Am Samstimorge vom 06. Februar hei mir üs mir Talstation Betelberg troffe. Mir si ga schlittle u hei i 3 Stund bis zu 7 Fahrte vom Leiterli ufe Stoos gmacht.

Am 19. Februar het mal wieder es Alternativprogramm ir Halle stattgfunde. Mir hei dr Judoclub Saanenland agfragt fürne Probelektion. Und so si a dem Abe 3 Mitglieder ar Lenk ir Halle gstande und hei üs ds Judo nächerbrunge.

Am Sunti 20. März hets für üsi Unihockeyteams ärnst gulte. Si hei sit afangs Januar immer am Dsischtigabig trainiert das me optimal vorbereitet uf Langnau a ds Turnier cha.
Hür si beid Mannschafte ir Kategorie Medium gsi, jedoch si si nid ir gliche Gruppe iteilt gsi u so hei si früächstens i de Rangierigsspiel chönä ufenand träffe.
Di jüngeri Gruppe git im vierte Spiel richtig Gas u gwinne grad 5:2. Das isch dr erscht Sieg gsi für di jüngeri Gruppe. Mir Leiter si na dem Sieg no so fest ire Euphorie gsi, das mir gar nid realisiere hei, dass es nahtlos witer geit. U so wird d Mannschaft mehrmals usgrüäfä dass mir sölä cho spiele.
U drum geits 5` nam erschte Sieg nahtlos witer. Es usglichnigs Spiel mitem Glück uf dr Lenker site. U dermit stöh si im Rangierigspiel um Platz 5 und 6.


Di älteri Gruppe het ä dürzogne Turnierverlouf, schlussendlich mues ds Penaltyschiesse entscheide ob si är jüngere Gruppe i ds Rangierigsspiel um Platz 5 u 6 cha folge. D Lenker mache das Souverän u hei di bessere Nerve. Si gwinne das Spiel u stöh dermit ou im gliche Rangierigsspiel.
U drum chunts zum grosse Lenkerduell. Di jüngere si motiviert u spiele guet. D Müädigkeit macht sich aber scho chli bemerkbar u so gwinne di ältere, wo ni chli meh Chraft und Usdur het, mit 2:0 gägä di jüngere Lenker. Dermit isch ds Unihockey für das Jugijahr ou scho wieder gschicht. Es isch ou ds letschte Turnier gsi, wo dr Stefan als Trainer isch derbi gsi, er het sich entschiede mitem Betreue vore Unihockeymannschaft ufdshörä. Mir andere Leiter wei aber o i Zuekunft mit 2 Mannschaft uf Langnau reise u am Turnier mitmache.

Am 27. Mai hei mir zum erschte Mal ä Velo-OL organisiert. Mir hei üs bim Schuelhus troffe. Hei 4er u 5er Gruppe bildet u si i dene Gruppe via Hallenbad/Mittlere Aegertenstrasse zur Schweizer Familie Füürstelle uf St. Stephan gfahre. Unterwegs hets 3 Pöste gäh wo jedi Gruppe 3 Frage het müäsä beantworte. Bi Brätlistell hets für d Giele Brot, Cervelats u öpis ds trinke gäh.
D Giele hei sech im nache Wald mitem Velo chöne ustobe. Bevor mir hei si, hets für jedi Gruppe pro richtigi Antwort vo de Pöste äs Schöggeli gäh.

Am Wucheend vom 11./12 Juni het üses Jahreshighlight stattgfunde. Trotz relativ durchzognem Wetterbricht si mir i üses Lager gange. D Leiter hei am Fritiabe no Militärblache gspannt, so dass mir de sicher gnue trochene Ruum zur verfüägig hei.
Am Samstimorge hei mir üs bim Bahnhof troffe. Mitem Roland Oehrli si mit när ufe Gibel gfahre. Vo dert us si di jüngere uf direktem Weg i Färmel gloffe. Di ältere hei ä chline Umwäg übere under und ober Albrist under d Füäss gno. Während dr Wanderig hets ca. 15 Minute fest grägnet. Mir hei üs aber nid la ufhalte u si tapfer witergloffe. Unterwegs hei mir ds Zmittag usem Rucksack gässä bevor mir a üsem Lagerort si itroffe.
Dert hei mir als erschts üsi Zält ufgstellt, so dass mir dr Ufbou hei im trochene über d Büni bringe. Aschliesend hei d Giele d Ufgab übercho ä Pizzaofe ds boue. Ds Ziel isch es gsi, das jede Giel imene eiget erboute Ofe als Znachtesse cha ä Pizza mache.
Wo d Öfe si bout gsi, hei d Giele müäsä ga Holz suche, so dass me mitem ifürä het chönä afah. Mir Leiter si finechli gforderet gsi, mit nid ganz trochnigem Holz d Füür i de Öfe ds entfache. Schlussendli isch das doch no glunge u so isch am Pizzabache nüme im Wäg gstande. U so het jede Giel ä Pizza als Znacht chönä gstalte.
Nam Znacht hei sech d Giele im nache Bach vergnügt u hei Wasser gstouet oder si ganz gmüätlich am Lagerfüür gsi. Dert hets am 9ni üses Dessert gäh. Di traditionelli Schoggicreme.
Am Lagerfüür hei mir üsä Abig la usklinge. U zum Glück het dr Wetterbricht nid ganz rächt gha, weme am Bucheli gloubt häti, hätis viel meh chönä Rägnä als es ta het.
Churz vor Mittinacht si di letschte Giele im Zelt verschwunde. Ruehig ischs no lang nid gsi u so hani am halbi 3 ir Nacht woni bi ufgwachet immer no Stimme usemene Zelt ghört… Na de halbi 6i hets bi vielne Tagwach gäh, u am 6i si di meischte Giele scho wieder uf de Bei gsi.
Am Lagerfüür hei mir üs ufgwärmt und d Schue trochnet wo ir Nacht si im Rägä gstande…
Öpä am 9ni hets ds Zmorge gäh. Na dem het ds Ufrume agfange. Wo alles isch suber gsi, hei mir üses traditionelle Lagerspiel, ds stöcklä, gspielt.
Churz vorem Mittag hei mir alles packt, hei ds Gruppefoto gmacht und si ds Fermeltal usi richtig Matte gloffe.
Churz vor dr Matte hei mir no brätlet u üses Zmittag gässä.
Aschliessend heimer no di letschte Meter under d Füäs gno u si a Bahnhof Matte gloffe. Vo dert us simer mitem Zug a d Lenk gfahre. Bevor ds Lager isch fertig gsi, si mir no i ds TEC. Dert hets für jede Giel no ä Glace gäh. U so isch üses Lager abgschlosse worde.

Nume 1 Wuche später het dr Jugitag 2016 ds Thun stattgfunde. Mir hei 8 Giele chönä motiviere am zweite Jugitag i dem Jugijahr mitdsmache. Sie hei wieder gueti Leischtige im Witwurf, Witsprung und ufem Hindernisparcours zeigt. Ds Wetter isch aber nid uf üsere Site gsi, so hets dr ganz morge gäng wieder grägnet. Am Mittag, wo mir grad di letschti Disziplin hei hinder üs gha, hei d Organisatore d Ussealage afah Evakuiere. Es Gwitter isch i d nächi cho. Na dr Mittagspouse isch d meldig vom OK cho, dass si dr Wettkampf us Sicherheitsgründ tüä absägä. Dür das isch d Pendelstafette i ds Wasser gheit. Mir hei üs när ufe Heiwäg gmacht u si scho am 3 am Namitag, viel früächer als planet, daheime ar Lenk acho.

Nam Jugitag hei mir üs no einisch troffe zum turne, bevor üses Jugijahr isch ds Änd gange.

Hie no es paar Zahle us dr Statistik vor Jugi:

32

Mal hei mir turnet

31

Mal isch ds maximum gsi wo e giel ir Jugi isch gsi bi de jüngere und

30

Mal bi de ältere

38 Giele hei mir ängi Jahr ir Jugi gha. Ufteilt si das gsi

18

älteri

20

jüngeri

Vo 1216

Summierti müglichi Azahl Lektione si

953

Stück bsuecht worde.

Im Durchschnit hei mir

15.16

Jüngeri und

14.63

Älteri Giele pro Abe dörfä begrüäsä.

Das git im Schnitt

29.78

Giele pro Fritiabe

I Prozent usdrückt si jede Fritiabe

84.2%

Vo de jüngere und

73.13%

Vo de ältere awäsend gsi

Über di gsamti Jugi gseh, si jede Friti abe

78.66 %

Awäsend gsi.

Alles i allem, 1 wildi Bandi und eis unvergesslichs Jugijahr, ds Jugijahr 2015/2016

August 2016 / Dominik Buchs