Mir si am 17. Ougste 2012 i ds nüiie Jugijahr gstartet. Mir hei wiederum 40 Buebe dörfä begrüässä.
Agfange hi mir i de erste zwüü Lektionen mit üsem Liechtathletikwettkampf. Ir erschte Wuche es Training u när ir zweite Wuche e Wettkampf, da mir das itz ds zweite Mal hei dürigfüährt himer scho chene d Resultat vergliiche, es isch erfröilich das verschiedeni Verbesserige hei stattgfunde. Am 23. Septemer 2012 hei 8 Jugigiele am Kuspo-Run teilgno u erfolgrich abgschlosse.
Na dä Herbstferie het dr Dominik i ds Militär müäsä u isch us dem Grund nüme so hüfig ir Halle a dstreffe gsi. Am 7. Dezember 2012 simer mit dr Jugi uf dr Ischbahn gsi u hei so wieder mal fürne Umgebigswechsel gsorgt. Ä Wuche druf am 14. Dezember het üsi traditionelli Waldwienachte stattgfunde. Dieses Jahr simer im Eywäldli stationiert gsi. Leider isch d Zyt chli knapp berechnet gsi u so himer na dem mer si acho, ganz schnell müäsä esse u ner scho wieder i ds Dorf loufe. So dass mer d Buebe pünktlich de Eltere hei chönä übergäh.
Uf Afangsjahr heimer üsi Turnzyte um 15 Minute nach hindere verschobe. So dass mir Leiter vor Arbeit chli meh Zyt überchömä pünktlich ir Jugi ds si.
Im 2013 het am 25. Januar üses erste Alternativeprogramm stattgfunde. Mir si zum dritte Mal i Schwingcheller uf St. Stephan u hei dert e cooli u lustigi Schwingstund dörfä miterlebe.
Am 08. Februar 2013 simer mit de Buebe im Schnee gsi. Mir si zum Schanzeriih gange u si dert dürä Schnee achigrutscht. Öpä ir helfti vom Abe heimer i Talbode gwächslet. Dert himer ufem Schnee no chli gschutet u Rugby gspilt. J
Ä Wuche druf am Samsti, 17. Februar simer mit üsere Gieleschaar a Betelberg ga schlittle u hei da dermit wieder es Highlight im Jugijahr erlebt.
Am 24. März het üsi Unihockeygruppe wieder am Unihockeyturnier ds Langnou teilgno. Sie hei sit Mitti Januar jede Mittwuch trainiert u sich so uf das Turnier vorbereitet. Ds erste Spiel gege TV Trueb hei üser Giele mit 4:2 gwunne. Bim zweite Spiel heisi no meh Gas gäh u hei sogar 10:1 gwunne. Im letschte Gruppespiel gege TV Zollbrück, dr Titelverteidiger vom letschte Jahr, het di ersti Niederlag usiguget. Sie hei 5:2 verlore. Mit dene Spiel hei si sech i Halbfinal qualifiziert. Nadem si das Spiel o gwunne hei si üser Giele zum erste Mal ir Gschicht im Final vo dem Turnier gstande! Dert heisis zum zweite Mal a dem Tag mitem TV Zollbrück ds tüä übercho. Wieder het Zollbrück ds Spiel für sich chene entscheide u so hei üser Jugigiele das Turnier ufem hervorragende zweite Rang abgschlosse.
Das si üsi Alternativprogramm gsi i dem Jugijahr. A de andere Fritige si mir ir Regel im Kuspo iquartiert gsi u hei dert lustigi u unvergesslichi Stunde erlebt.
Na de Früäligsferie hets i üsem Leiterteam e zuewachs gäh. Dr Christoph Pulfer untertstütz üs itz ou.
Ds Jahreshighlight het am Wucheend vom 15. / 16. Juni 2013 stattgfunde. Üses Jugilager mier si vom Alperösli richtig Betelberg gloffe. Di Ältere Giele hei chli e grösseri Rundi als plant absolviert, da dr Martin u dr Bruno e Abwzigig verpasst hei. J
Ufem Wäg a üses Ziel heimer e Mittagshalt gmacht. När simer wytergloffe u hei am früächä Namitag üses Ziel, dr Hasler erreicht. Dert heimer agfange üsi Zelt ufboue. Wo das gmacht isch gsi, simer i nah glägnig Wald ga Holz sueche. Wo mer üses Lagerfüür hei azüntet gha, heimer ds Highlight vo dem Lager dürigfüährt. Im Vorfeld vom Lager heimer für jede Jugigiel es wisses T-Shirt u T-Shirtmalfarb organisiert. D Giele hei jetz nach Lust und Laune ihres T-Shirt chene bepinsle. Di einzigsti Vorgab womer hei gha, isch gsi, dass irgendwo ufem T-Shirt dr Schriftzug „Jugilager 2013“ steit. Für das heimer e Schablone la afertige, so dass dr Schriftzug bi allne glich usgseh het. So si bis zum Znacht viil wunderschöni T-Shirt entstande. Traditionellerwiis heimer zum Znacht brätlet u nadem no ordentli Holz agleit, so dass zwöii schöni Lagerfüür entstande si. Am nächstä Morge, si nare chüälä Nacht am 6i, di erste Buebe wieder verwachet u ufgstande. Öpä am 9ni heimer zmorge gässä u nam Zmorge heimer no e rundi Gstöcklet. Jede Giel het 1 Franke übercho u het das chönä verspile. Nadem heimer afah zemerume u putze. Wo mer alles hei zemegrumt gha heimer mitem Abstieg agfange. Bim Restaurant Walleg simer no mitere Chalte Platte verwöhnt u gstärkt worde. När isch üse letscht Teil ufem Programm gstande. Mir si dür d Wallbachschlucht i ds Dörfli zrugg cho. Bir Talstation vor Sesselbahn hei ali Giele ds bemalene T-Shirt agleit. Bim Luufe dür ds Dorf hei so ali Giele ihres T-Shirt chene präsentiere. Am Bahnhof si d Giele vo de Eltere abgholt worde. Dert hei mir üsnä Abgänger no es chlises Gschenkli überreicht u so für ihri Treuii dankt. 2 vo 5 Giele si über di gsamti Schuelzyt, aso 9 Jahr ir Jugi tätig gsi. Am letschte Fritig vom Jahr het üsi Jahresuswertig stattgfunde. Mir si glücklich ou am Endi vom Jahr 40 Giele i üsere Jugi ds ha.
Da dermit isch üses Jugijahr beendet gsi.
Wüll aber sit den chli viel Sache ir Jugi passiert si gani hie ono churz uf das ih. Ar Planigssitzig vom nüiie Jugijahr het dr Bruno gseit, dass er weti ufhörä mit leite. Sit de Herbstferie heimer wieder e nüiie Leiter, dr Samuel Humm. Ihm gfallts ir Jugi u er weti mitem Livio u Christoph evtl. mal e Leiterkurs bsueche. Am 10. Januar 2014 heimer dr Bruno vo üsem Leiterteam mit de Giele, na 17 Jahr als Jugileiter verabschiedet.
