Jahresbericht 2018 / 2019

I dem Bricht geits um d Jugi Knaben, weg dr eifachheit u gwohnheit hie nume ging als „d Jugi“ gnennt.

Mir si am 17. Ougste 2018 i ds nüiie Jugijahr gstartet. Mir hei vier nüii Mitglieder dörfä begrüäsä u hei mit insgesamt 46 Buebe gstartet.
Nüii hei mir mit drüü Gruppe turnet. D Giele vor achte u nünte Klass si nüii vom 20.05 bis 21.35 aktiv gsi. Mir hei im vordere Jahr extrem viel Giele gha u us däm Grund hei mir Leiter üs zu däm Schritt entschlosse.

Am 26. Ougste heimer mir 14 Giele chönä überzüge am Jugitag mitdsmache. Üs hei 20 Meitli am Jugitag im Saaneland unterstützt.

Am 30. September hei 7 Giele und ei Leiter am ar Swisstrailtour oder früiie Iffigelouf/KUSPO-Run mitgmacht. Ds erschte Mal i däm Jugijahr isch ä Giel schneller im Iffige gsi als mini Wenigkeit…
Am Namitag heimer mit 6 Buebe am Kinderlouf mitgmacht. Äs si all 6 Giele uf ds Podest gloffe. Für d Jugi hets 1 Sieg, zwe Zweit Plätz u drü Dritt Plätz gäh.
Na dene Strapaze het im Ziel ds warte ufe Säm agfange. Är isch scho am Morge früäch uf di längi Strecki vo 50.4km gange. Kurz vorem vieri am Namitag oder na nid ganz 8 Stund hei mir dr Säm im Ziel dörfä begrüässä. Dr Säm het i sire Kategorie o gwunne u so het d Jugi ä zwöitä Sieg chönä firä.

Am 19. Oktober hei mir d MZH nid chönä bruche, us däm Grund hei mir ä Stärn-OL im Dorf organisiert. D Giele hei vo Poste zu Poste müäse seckle u bi jedem Poste ä Buechstabe mitnäh. Am Schluss hets äs Lösigswort gäh. Für di schnällste heimer wieder chlini Priisli i Form vo Süessigkeite derbi gha.

Am 03. November 2018 hei nün vo de ältiste Giele mit dr Unterstützig vom Männerturne am Unihockeyturnier vom TV-Saane-Gstaad mitgmacht. Äs Turnier für alli wo ir nünte Klasse oder älter si. Nach sächs sehr intensive Spiel hei mir hei üs ufem siebete Rang klassiert. Total hei 13 Mannschafte mitgmacht. Ä super Leischtig für sone jungi Mannschaft.

Üsi traditionelli Jugiwienachte het am 14. Dezember 2018 stattgfunde. Mir si mit dä Giele vom Schuelhuus über d Schanzestrass i ds KUSPO gloffe. Dert hets für jede Giel Tee, Cevelats, Brot, Mandarindli, Ärdnüssli und am Schluss no Schöggeli gäh, so dass mir üs hei chönä sterchä. Wülls i däm Jahr ou wieder het Schnee gha, ischs ä wildi Wienachte worde. D Jungs wi o äs paar Leiter hei zum Schluss wie wanderndi Schneemänner usgseh. ;-)
Di ältiste Giele hei säch aber no nid gnueg Ustobet gha u so si mir am Abig am 8i no i d Turnhalle. Dert heimer no ds grosse Trampolin ufgstellt u hei üs so no chli ustobet.

Am 11. Januar 2019 het üses traditionelle Jugischwinge stattgfunde. Mir hei a däm Abig insgesamt 25 Giele dörfä begrüsse wo unter fachmännischer Aleitig ä Iblick i Schwingsport hei übercho.

Am 8. Februar het üses Spiel und Spass im Schnee stattgfunde. Mir hei Rugby oder Fuessballgspiel oder si ganz eifach am Hang ga rutsche. Äs isch ä sehr intensive Abig gsi.

Am Fritigabig vom 22. Februar heimer d MZH äs witers Mal nid gha. Di zwo jüngste Gruppe si a di underi Sektion vor Wallegg ga schlittle u di ältesti Gruppe het sech im ehemalige Restaurant Löiä troffe. Si hei der dr Abig bim Keglä verbracht.

Am 17. März 2019 het üses Unihockeyfieber agfange. Nach 8 Mal trainiere am Zischitgabig het ds Unihockeyturnier vom TBO ds Thun ir Armeesporthalle stattgfunde. D Mannschaft vom Dominik het a däm Turnier teilgno. Ou chli als Vorbereitig für ds Turnier ds Langnau wo ä Wuche später het stattgfunde. D Mannschaft het äs super Turnier zeigt. Leider hei si di falsch Spiel verlore u so si mir ufem sächste Platz klassiert gsi. D Wartezyt für d Heireis ds Thun hei mir üs mitemene Bsuech im McDonalds überbrückt.

Ä Wuche später am 24. März 2019 het ds Langnau ds Unihockeyturnier stattgfunde. Mir si i däm Jahr mit drüü Mannschafte oder anders gseit mit 24 Giele i ds Ämmital greist. Mir hei ä coolä Tag mit viel spannende Spiel dörfä erläbä.  Di jüngsti Gruppe (Kategorie Medium) het sech ufem sächste Rang klassiert. Die andere beide Mannschafte si ir Kategorie Large gsi. Für die beide Mannschafte het dr füft u siebet Rang usigugget.
D Jungs chöis albe chum erwarte we wieder ds Unihockeyturnier vor dr Türe steit.

Am 24. Mai 2019 isch ds Bike ufem Programm gstande. Wüll d Leiter wäg dr Gwärbusstellig chli beschäftiget si gsi, hei mir dr Lian Zbären u Louis Kuhnen agfragt ob si di Lektione wette übernäh. Natürlich i begleitig vomen Jugileiter. Di zwe hei zuegseit u so si mir mit ihne als Leiter uf ds Bike. Di jüngsti Gruppe isch zur Gondelbahn Betelberg u isch dert chli über Stäggätritte achi gfahre. Di mittleri Gruppe isch richtige Tschugge unterwägs gsi u när äs Wanderwägli achi cruiset. U di ältesti Gruppe het säch ufe Wäg richtig Metsch gmacht. Dr Lian u dr Louis hei das super gmacht u si hei geniali Programm resp. Routene usdänkt gha.

Am Samstig 25. Mai hei 12 Giele vor Jugi ar Gwärbusstellig dörfä ufträttä. Nach mehrerne gmeinsame Üebe hei mir mit dä Meitli ä cooli Show uf d Bei gstellt gha. U so heimer am Minitramp, am Bode oder ufem Barre während öpä zwänzg Minute am Publikum öpis vorturnet.

Über d Uffahrt vom 30./31. Mai 2019 het üses Jugilager stattgfunde. Mir hei 17 Giele dörfä begrüässe. Zum erste Mal heimer ds Simmetal verlah. Mir si mitem Zug bis uf Thun u när hei sech üsi Wäge trennt. Di jüngere si mitem Bus Richtig Homberg gfahre u di ältere bis uf Steffisburg. Dert hei när d Wanderige a üse Lagerplatz, wo i däm Jahr ds Schwarzenegg isch gsi. gstartet. Bi bestem Wätter u wunderbarem Usblick uf d Stockhorn chöti hei mir am Namitag üse Lagerplatz erreicht. Wo üser Lagerfüür brönt hei, hets für d Giele di ersti Stärchig mit Schoggibanane gäh. Na däm heimer üs im Nach glägne Wald ustobet. Mir hei mehreri Rundine Röiber u Polig spielt. Bis es öpä am Abig am 7ni üses Znacht het gäh. Nam letscht jährige Erfolg mit de Burger, hei mir das hüür wiederholt. D Giele hei ihri Burger individuell chöne zämästelle u so dr Hunger stille. Nam Znacht simer no chli am Lagerfüür gsi, bevor mir nomal i Wald si. Ir Dämmerig heimer nomal mehreri Rundine Röiber u Polig gspielt bis es isch dunkel worde. Na dene Spieli hets no üses traditionelle Dessert gäh, ds Schoggicake. Bim Lagerfüür hei mir dä Abig la usklinge. Bevor di meischte Giele i dä Zelt verschwunde si für ga ds lige. Ganz Still isch es aber di ganzi Nacht nid worde. Wo d Dunkelheit verschwunde isch, isch definitiv fertig gsi mit dr Nachtrueh u so si ging meh u meh Giele erwachet. Bis zum Zmorge heimer üsi Lagerfüür gnosse. Nachem Zmorge ischs ou scho a ds Abboue vom Lagerplatz gange. Wo mir das o hei gmacht gha, hei mir mit dä Gielen o gstöcklet.

Uf d Mittagszyt hei mir üs ufe Wäg gmacht, Richtig Unterlangenegg. Dert hei mir bir Bäckerei Aebersold ä chalti Platte zum Zmittag gha.
Na dr letschte Stärchig simer ufe Bus für uf Thun ds fahre. Dert heimer dr Zug gno für zrugg a d Lenk ds cho. Äs isch wieder mal äs unvergesslichs Jugilager ds Änd gange, wo di zum Teil erschöpfte Giele am Bahnhof Lenk vo de Eltere si abgholt worde.

Dermit isch üses Jahreshiglight scho umi verbii gsi.

Am 21. Juni 2019 heimer üs zum letschte Mal i däm Jugijahr troffä. Mir hei a däm Abig 8 Jugigiele dörfä verabschiede. Di giele si 6, 8 und ganzi 5 Stück si sogar 9 Jahr ir Jugi gsi. Mitemene chline Gschänkli heimer si us dr Jugi verabschiedet.

Im Normalfall hei mir üs ir Mehrzweckhalle zum turne troffe u hei üs dert ustobet. Mir hei am Ändi vom Jugijahr 44 Giele ir Jugi gha. Das si 4 weniger als im Vorjahr. Im Schnitt hei mir 32.03 Giele pro Abig dörfä begrüsä, oder anders usdrückt si 72.79% vo allne Giele jede Fritig ir Halle awäsend gsi. Über ds ganze Jugijahr hei mir 1089 Händ zur Begrüässig dörfä schüttlä.

                                                                                                                                                Januar 2020 / Dominik Buchs

 

Hie no es paar Zahle us dr Statistik vor Jugi:

34

Mal hei mir turnet

32

Mal isch ds maximum gsi wo e giel ir Jugi isch gsi bi de jüngere und

32

Mal bi de mittlere

31

Mal bi de ältere

44 Giele hei mir ängi Jahr ir Jugi gha. Ufteilt si das gsi

12

älteri

16

mittlei

16

jüngeri

Vo 1530

Summierti müglichi Azahl Lektione si

1089

Stück bsuecht worde.

Im Durchschnit hei mir

12.62

Jüngeri

10.94

Mitterli

8.47

Älteri Giele pro Abe dörfä begrüäsä.

Das git im Schnitt

32.03

Giele pro Fritiabe

I Prozent usdrückt si jede Fritiabe

78.86

Vo de jüngere

68.38

Vo de mittlere

70.59

Vo de ältere awäsend gsi

Über di gsamti Jugi gseh, si jede Friti abe

72.79

Awäsend gsi.

August 2019 / Dominik Buchs