D Jugi isch am 16. August 2013 i ds nüiie Jugijahr gstartet. Was üs Leiter sehr erfreut het, si di siebe nüiie Jugigiele, wo mir hei dörfä begrüäsä. Das hets ir ganze Gschicht vor Jugi no nie gäh. Mit insgesamt 39 Buebe hei mir das Jugijahr i agriff gno.
Am 22 September 2013 het ä Teil vo de Leiter, sowie e Teil vo de Giele am Iffigelouf resp. KUSPO-Run mitgmacht. Vo üsne 5 Giele wo gstartet si, si 4 Stück uf ds Podest gloffe.
Na dä Herbstferie hei mir Zuewachs i üsem Leiterteam übercho, dr Samuel Humm unterstützt üs jetzt Tatchräftig.
Am 29 November 2013 heimer öpis spezielles für d Giele planet gha. Mir hei dänkt mir wette mal chli Tanze. Und so hei mir d Janine Bowee organisiert. Si het mit üs, e wunderbari Hiphop Lektion abghalte.
Nume ei Wuche später isch üse traditionell Bsuech uf dr Ischbahn ufem Programm gstande. Mir hei üs 2 Stund ufem Isch vergnüägt.
Und ä witeri Wuche später het üsi traditionelli Waldwienachte stattgfunde. Nachdem mir ds Dorf chli umwanderet hei, si mir im Müläwäldli acho. Dert hei mir leider bi wenig Schnee üsi Waldwienachte gfiiret. Für jede Jugigiel hets ä Cervelat, Nüssli, Schöggeli und natürlich Tee gäh.
Im nüiie Jahr, am 10. Januar ischs sowit gsi. Dr Bruno Schwaiger heti di letschti Jugilektion für d Giele sölä leite. Da er aber isch chrank worde, het är üsi planeti Sache übere Huufe gworfe. Bim Gruppewächsel wo ali Giele si awäsend gsi, hei mir dr Bruno dörfä verabschiede. Als chlises Dankeschön hei mir ihm es Poster mit Föteli vo ihm überreicht. Dert druffe hei alli Buebe unterschriebe gha. Mir hei am Bruno dermit für 17 lustigi Jugijahr dankt.
Ei Wuche später si mir mit de Giele i Schwingkeller uf St. Stephan u hei dert üs chönä ustobe. Am 31. Januar simer verusse im Schnee gsi u hei üs, am Schanzeriih vergnüägt u betätiget.
Am Samstigmorge, 15. Februar 2014, si mir mit de Giele a Betelberg ga schlittle. Mir hei am akündigte Föhnsturm trotzt u hei es paar rasanti Fahrte dörfä erlebe. Ds Znüni hei mir im Restaurant Stoos freundlicherwiis gsponseret übercho. J
Am 23. März 2014 isch es grosses Highlight für üsi Unihockeyaner ufem Programm gstande. Mir si mit eiere Mannschaft a ds Unihockeyturnier uf Langnou gfahre. Ds erschte Mal ir Gschicht, hei mir ä chlini Fängruppe mitgno. Sie hei üs mitemene Liintuech u dr Stimm lut unterstützt. Ou ds erschte Mal hets uf üsere Homepage e Liveticker gäh, wo d Eltere daheime ar Lenk hei chöne läsä wi guet üser Giele gspielt hei . Ds erste Spiel hei si unentschiede gspielt. Die nächstä 4 Spiel hei si ali gwunne und drum si d Giele so nach fünf Spiel Gruppesieger gsi u im Final gstande.
När isch es sowit gsi, d Lenkergiele si im Finalspiel gsi. Dert hei si mitere extreme Rueh gspielt u si na öpä 6 Minute mit 1:0 i Füärig gange. Leider hei si churz vor Schluss no dr usglich übercho. Jetz het ds Penaltyschiesse müäsä entscheide. Dert hei d Länkergiele di sterchere Närvä gha u so dr Final na Penaltyschiesse mit 3:2 gwunne. Das het zur Folg gha, dass mir mit de Unihockeyaner ds Heimberg im McDonalds e Zwischestop igleit hei. Mit dem Sieg hei d Giele ä riesigi Reaktion usglöst. So dass mir Leiter ar nächste Leitersitzig beschlosse hei i Zuekunft mit 2 Unihockeyteams, äs jüngers u äs älters, uf Langnou ds fahre.
Am 16. Mai 2014 si mir mit üsnä Giele ga Bike. Mir si mit de Bikes dürä Seefluehwald uf, chli ga ds Pöscheried ga unsicher mache.
Das si üsi Alternativprogramm gsi i dem Jugijahr. A de andere Fritige si mir ir Regel im Kuspo iquartiert gsi u hei dert lustigi/ unvergesslichi u unfallfreii Stunde erlebt.
Ds Jahreshiglight het im Wucheend vom 14./15. Juni 2014 stattgfunde, üses Jugilager. Am Samstig morge si mit mit 15 Giele am halbi zähni ufe Zug richtig Zweismme. Ir Matte si di jüngere Buebe usgstige, di ältere si witer bis uf St.Stephan gfahre. Ds Gepäck sowie d Zelt hei mir vorher i Bus iglade, die si zu üsem Lagerplatz gfahre worde. Vo St.Stephan resp. vor Matte us si mir Richtig Dürewald gloffe. Unterwegs hei mir Zmittag usem Rucksack gässä. Wo mir si am Lagerplatz acho,hei mir als ersts üsi Zelt ufgstellt. Da dr Petrus nid ganz gwüsä het, was er üs so für Wätter wot gäh. Nadem mir d Zelt hei ufgstellt gha, si mit mit allne Buebe i Wald ga Holz samle, so dass mir zwei Füürstelle füre Tee u für ds Brätlä hei chönä mache. Wo de üsi Füür brönt hei u ds Teewasser am choche isch gsi, hei mir üsi Giele mitere Ufgab beschäftiget. U zwar hei si i 2-3er Grüppeli es Wasserredli chönä boue u das när im Naheglägne Bach chöne i Betrieb näh. Mir Leiter hei we nötig ghulfe und se när am Schluss bewertet. Wo das isch düri gsi, hei d Giele e churzi Zit chöne mache was si hei wölä. Öpä am sächsi am Abig hei mir ds Füür freigäh zum brätlä. Dankem Stefan, wo dr Teig gmacht het, het jede Giel äs Stäckäbrot chöne bache. Nachem Znacht wos langsam het afa idunkle hets üsi traditionelli Dessert gäh. Nadem si mir gmüätlich no bim Füür ghocket u hei üs verschiedeni Gschichtli verzellt. Wos öpä Mittinacht isch gsi, si de ou di letschte Giele im Zelt gsi. Gschlafe hei si aber no lang nid, mi het se öpä bis am 01.30 no ghörä rede… J Am 05.30 het me di jüngste Buebe ou scho wieder ghört, u so hets langsam Tagwach gäh. Am morge hei mir Zmorge gässä u gege Mittag no ds letschte Spiel gspielt, ds Stöcklä. Jede Giel het 1 Franke übercho u het das chönä verspile. Nadem heimer afah zemerume u putze. Wo mer alles hei zemegrumt gha heimer mitem Abstieg agfange. Mir si richtig Flöschwäg gloffe. Dert hei mir dr Kuhnen Göpf troffe. Är het üs dürä Flöschwäg begleitet, da es dert doch es paarne Orte zimli achi geit. Ihm heimer ou ds danke, dass er im Flöschwäg es paar zuesätzlichi Sicherigsseili het montiert, so dass mir üs immer hei chönä häbä. Mitere Wunderbare Ussicht uf d Lenk si mir so langsam am Dorf necher cho. Mir si när über d Ägerte achi gloffe und hei ds Restaurant Pinochio agstüret. Dert hei mir d Giele mitemene Coupe und öpis ds trinke überrascht. J Gägä später Namitag si mir ufem Bahnhof acho u dert vo de Eltere empfange worde. Ufem Bahnhofplatz hei mir üsi 2 Jugiabgänger mitemene chline Gschänk für sächs und acht Jahr ir Jugi dörfä danke u verabschiede. Ir letschte Jugilektion hei mir üsi Jahresuswärtig vorgno und no chli gspielt. Leider isch das när ou di letschti Jugilektion vom Christopf Pulfer gsi. Är het üs, wegemene Arbeitgeberwechsel, leider müäsä verlah. Mir danke am „Pufi“ herzlich für die 1.5 Jahr volle Isatz für d Jugi Lenk. Und so isch üses Jugijahr 2013/2014 mit vielne Higlights beendet worde.
